Nikita Sergejewitsch Chruschtschow

Dr Nikita Sergejewitsch Chruschtschow (russisch Никита Сергеевич Хрущёв [nʲɪˈkʲitə sʲɪˈrgʲejɪvʲɪtʲɕ xruˈʃɕof] loose^ⓘ/?, wüss. Dransliterazioon Nikita Sergeevič Chruščëv, ängl. Dranskripzioon Nikita Khrushchev; * 3.^jul./ 15. April 1894^greg. z Kalinowka, Ujesd Dmitrijew, Guwernemänt Kursk, Russischs Kaiserriich, hüte Oblast Kursk, Russland; † 11. Septämber 1971 z Moskau) isch e sowjetische Politiker gsi. Dr Chruschtschow isch vo 1953 bis 1964 Bardeischef vo dr KPdSU gsi und vo 1958 bis 1964 au no as Vorsitzende vom Ministerroot (Ministerbresidänt) au Regierigsschef vo dr UdSSR. Er het as e schlaue Machtpolitiker gulte und as Mäister vo dr sozialistische Rhetorik.

Noch em Dood vom Stalin im Merz 1953 isch er Bardeischef (nominell dr erst Bardeisekretär) vo dr KPdSU worde. Am XX. Bardeidaag vo dr KPdSU 1956 het er e Ghäimreed riskiert und din dr Stalin agriffe und eso d Entstalinisierig iigläitet. Er isch druf dr sowjetisch Politiker mit em grösste Iifluss gsi. 1958 isch er au Ministerbresidänt worde und het e hufe Reforme aagstoosse, vor allem in dr Gsellschafts- und dr Wirtschaftspolitik, dr Bildig und dr Kultur. Ussepolitisch isch er für e friidligi Koexistänz mit em Weste gstande, het aber nit Rageetetechnik und Ufrüstig dr UdSSR die globali Füerigsrolle welle verschaffe. Eso isch s 1962 zur Kuba-Krise mit de USA cho, doch isch dank dr Ghäimdiplomatii mit em Bresidänt John F. Kennedy e Dritte Wältchrieg vermiide worde.

Wäge sinere Bardeireform und dr Politik vo dr Aanööcherig an d Bundesrepublik Dütschland het er e hufe Aahänger verloore und isch 1964 vom Leonid Breschnew gstürzt und 1966 us em Zentralkomitee usgschlosse worde. E Joor vor sim Dood si 1970 sini Memuaare Khrushchev remembers erschiine, er het aber us Rücksicht uf d Bardei nie zuegee ass är dr Autor gsi sig. Si Soon Sergej Chruschtschow isch in dr Sowjetunion Ruumfaartääscheniöör gsi und läbt hüt in de USA.